Majalisar jihar Kano za ta fara binciken bidiyon Ganduje

GandujeHakkin mallakar hotoSALIHU TANKO

Majalisar dokokin jihar Kano da ke arewacin Najeriya ta kaddamar da kwamiti na mutum bakwai domin yin bincike a kan wasu jerin bidiyo da ke ikirarin nuna gwamnan jihar da karbar “cin hanci” daga wajen wasu ‘yan kwangila.

A ranar Lahadi ne kuma mawallafin jaridar Ja’afar Ja’afar ya saki bidiyo na farko daga cikin kusan 15 da ya ce yana da su, a shafin jaridar tasa.

Sai dai gwamnatin jihar Kano ta musanta wannan zargi.

  • Ina fuskantar barazana saboda labarin fallasa — Jaafar Jaafar
  • Jaafar Jaafar: Babu hannun gwamnatin Kano

Wani dan majalisar dokoki da ke wakiltar karamar hukumar Warawa Alhaji Labaran Abdul Madari ne ya gabatar da bukatar a yi bincike kan lamarin duba da muhimmancinsa, inda kuma dan majalisa mai wakiltar mazabar birni da kewaye Alhaji Baffa Dan Agundi ya goyi bayan hakan.

Honorabul Madari ya nuna cewa alhakin majalisar ne yin bincike a kan duk wani lamari da ya shafi jihar da zai iya yin barazana ga zaman lafiyarta.

Shugaban Majalisar Kabiru Alhassan Rurum ya bukaci kwamitin ya yi bincike sosai kan batun ya kuma gabatar da rahotonsa cikin wata guda.

Shugaban masu rinjaye Honorabul Baffa Babba Dan Agundi ne zai jagoranci kwamitin, da kuma sauran mambobi Zubairu Massu da Garba Ya’u Gwarmai da Abdulaziz Garba Gafasa da Abubakar Uba Galadima da kuma Barista Mujitaba Aminu wanda zai zama sakataren kwamitin.

Mafi yawan ‘yan majalisar dai sun nuna goyon bayansu kan wannan bincike da za a yi.

Sai dai Honorabul Baffa Babba Dan Agundi ya bai wa gwamnatin jihar shawarar cewa ta dakatar da shigar da karar mawallafin Daily Nigerian da ta yi niyya, yana mai cewa majalisar dokokin jiha na da hurumin yin binciken al’amura irin wannan.

Wannan layi ne

Mene ne a cikin bidiyon?

A ranar Lahadi ne Jaafar Jaafar, mawallafin jaridar Daily Nigerian ya saki wannan bidiyo, wanda ake zargin wani dan kwangila yana mika wa Gwamna Abdullahi Umar Ganduje bandir-bandir na dalolin Amurka.

Jim kadan da fitan bidiyon, gwamnatin jihar Kano ta fitar da sanarwa tana karyata lamarin, tare da yin barazanar kai karar Jaafar Jaafar kan abun da ta kira bata sunan gwamnan.

Mawallafin bidiyon ya ce zai ci gaba da fitar da bidiyon.

A cikin bidiyon dai da a ka saki na farko babu murya sai kidan sarewa, al’amarin da wasu ke ganin shirya shi kawai aka yi.

Sai dai a bidiyo na biyu da ya saki ranar Litinin, an jiyo muryar wanda ake zargin dan kwangilar ne yana umartar gwamnan da ya tashi tsaye yana cewa “ban sani ba ko tashi za ka yi a dinga mika ma, a aljihunka sai sun fi zama lafiya”.

Wannan al’amari dai na ci gaba da janyo ce-ce ku-ce a Najeriya musamman a kafofin sada zumunta.

BBC Hausa

Hassan Usman Author

Leave a Reply

Your email address will not be published. Required fields are marked *